Првиот инспектор на Град Скопје најави повеќе казни за загадувачите

Добивај вести на Viber

Мирослав Богдановски, главниот инспектор на Град Скопје, најави поголеми казни за индустриските капацитети кои загадуваат во грејната сезона што следува, иако во интервју за „Мета“ вели дека не е задоволен од капацитетите кои ги има градскиот инспекторат.

– Ќе видите какви и колкави казни ќе има за прекршителите. Досега имавме премалку случаи на казнување во однос на тоа колкав град е Скопје и колкаво е загадувањето. Оваа зима ќе биде многу интензивен тој процес на инспектирање и граѓаните ќе можат да видат многу зголемени контроли над индустриските капацитети кои се под наша надлежност бидејќи во Скопје има многу такви објекти чии емисии од оџаците ги надминуваат граничните вредности. Еден типичен случај кога интервениравме беше поради црн чад од оџакот на зградата на ЈП Македонски шуми. Веднаш пративме инспектори, беа измерени повисоки од дозволените вредности на емисиите, беше петок, луѓето за време на викендот викнале мајстори и се испоставило дека било потребно штелување на бренерите, значи количеството воздух при согорувањето не било соодветно. Такви случаи, кога со интервенција на инспекцијата едноставни технички интервенции може да се ублажат штетните емисии воопшто не се реткост, најавува тој.

– Во октомври кадровски ќе се доекипираме, а некои од инспекторите ќе бидат прераспределени на други места поради тоа што не ги исполниле зададените обврски па дури и опструирале. Веќе година дена се молиме со некои луѓе да покажат иницијатива и да пронаоѓаат прекршители. Тринаесет години Градската инспекција немала раководител и некои луѓе потешко се соочија со поинаков начин на работа, а јас не сум задоволен од резултатите. Инспекторатот за 40 инспектори има во моментов 5 возила, ниту едно не е теренско, ама барем имаме за првпат после многу години две нови. Потегнавме измени на околу 15 закони – Закон за јавна чистота, Закон за животна средина, Закон за спорт, за туризам и угостителство… Сите барани измени се во насока на зголемување на ингеренциите на градските инспектори кои би постапувале против прекршителите, вели Богдановски.

Додава дека се чека усвојување на измена на правилникот од надлежното министерство со кој овозможи поопфатен надзор над печките во индустриските погони.

- Она што ни е посебно важно, минатиот декември инициравме измена на правилникот за гранични вредности за печки до еден мегават, кој досега им оневозможуваше на инспекторите да пишуваат прекршочни казни, а кој уште не е усвоен во Министерството за животна средина иако е документ од една страница. Процедурата на пеглање на предлогот е веќе завршена и само чека потпис од министерот. Инспекторите со години биле со врзани раце за да казнуваат загадувачи токму со овој правилник, па сепак никој до сега не иницирал негова промена. Сите молчеле, додава Богдановски.

Најави дека и оваа година ќе се снима теренот со дрон за пронаоѓање на црните точки и сомнителни активности, со што би се зголемила ефикасноста на инспекцијата.