Пукале во мигранти, повредиле деца
Објавено во: Балкан 31 Мај, 2018
Полицијата во хрватскиот град Задар спречила обид за шверцување емигранти, откако запреле комби со емигранти испукувајќи кон него повеќе куршуми.
Инцидентот се случил вчера околу 22 часот, а полицијата го сопрела комбито со емигранти благодарение на дојава, пишува хрватската агенција Хина.
Емигрантите се наоѓале во комби со странски регистарски таблички, а се претпоставува дека нелегално ја минале границата со БиХ.
Полицијата по дојавата поставила блокади со светлосни и звучни сигнали. Меѓутоа, возачот не сопрел туку продолжил да вози кон полицајците, поради што тие испукале повеќе куршуми во негов правец.
Тој избегал од комбито во шумата, а во возилото се најдени 29 странски државјани од повеќе земји, меѓу кои и две деца со повреди од огнено оружје и повеќе лица повредени од опасното возење.
Полицијата соопшти дека децата се префрлени во задарската болница и не се во животна опасност.