Со фотоволтаици и колектори ќе работат само обучени и сертифицирани инженери

Добивај вести на Viber

Само сертифицирани градежни работници за вештини за енергетска ефикасност во иднина ќе можат да работат со обновливи извори на енергија. Од Здружението на енергетика при Стопанската комора на Македонија велат дека прокативно се дејствува на темата за обучени работници во областа на обновливи ивори на енергија.

„На некој начин во однос на фотоволтаици дејствуваме проактивно, обуките коишто ќе се направат да ги имаме како бенефит но и истите да бидат на еден начин обврзувачки“, истакна на денешената прес конференција Ристо Јаневски, претседател на Здружението на енергетика при Стопанската Комора на Македонија.

Тој потенцираше дека на Македонскиот енергетски форум претставникот на европската заедница истакнал дека во иднина евроспките пари ќе бидат насочени кон обновливи извори на енергија.

„Во проектот Пазарно ориентирани вештини за одржливо енерегетски ефикасно градење, се опфатени 6 партнери, 5 од земјава и еден од странство. Проектот има за цел создавање на квалификувана работна сила во градежништвото, односно дополнително подобрување на вештините на градежните професиналци, зајакнување на мултидисциплинарниот пристап кон одржливо градење и демонстрирање на разликите во проектираните и актелните енергетски карактеристики на градбите, но и зголемување на пазарната вредност на работната сила која ја поминала обуката, односно препознавање на пазарната вредност на вештините на енергетски ефикасното градење“, рече Ристо Иванов, претседател на Здружението за бизнис консултации Креација, фирма која е партнер во проектот.

Во наредниов период ќе се обучуваат 20 инженери и 40 техничари за проектирање и изведба на фотоволтаици и сончеви топлински колектори преку проектот „Пазарно ориентирани вештини за одржливо енергетски ефикасно градење“ кој го финансира Европската унија, а се реализира од Стопанската комора.

Партнерите на проектот очекуваат на повикот за обука со вештини за енергетска ефикасност да се пријават работници кои имаат барем основно познавање во областа на енергетската ефикасност, архитекти, инженери и рабоници од градежниот сектор.