Радев го обвинува Османи за напредокот на Северна Македонија и поддршката од меѓународните пријатели
Објавено во: Македонија 26 Јуни, 2023
Бугарскиот претседател Румен Радев за бугарските медиуми го обвинува шефот на македонската дипломатија за позитивниот извештај на Европскиот парламент и ЕК за Северна Македонија.
„Индикативен е и случајот со подготвениот извештај на Европскиот парламент за извештајот на ЕК за РСМ за 2022 година. Во интервјуто на 23 мај, министерот за надворешни работи на РСМ јавно изјави дека имал контакти со европратеници од Комитетот за надворешна политика на Европскиот парламент и влијаеше на текстот на нацрт-извештајот, директно вклучен во процесот на изработка со писмени предлози. „Никогаш досега не и било дозволено на земја кандидат за членство да има такво влијание врз работата на европските институции“, вели Радев.
Претседателот на Бугарија гласно го критикува министерот Османи и за донесената Резолуција на германскиот Бундестаг, со која се афирмира македонскиот идентитет, јазик и култура како и најавите дека исто таква Резолуција ќе донесат и други држави.
„Друг пример за лобистичката политика на Скопје е најавата на шефот на дипломатијата на земјата дека другите земји членки имаат намера да излезат со декларации слични на резолуцијата на германскиот Бундестаг“, додаде претседателот на Бугарија Румен Радев.