Рама тврди дека и најголемите националисти не ја заговараат Голема Албанија
Објавено во: Балкан 31 Мај, 2018
Aлбанскиот премиер, Еди Рама изјави дека Косово има највисоки стандарди на малцинските права.
Рама, на дебатата на презентацијата на книгата „Нова држава – модерен државник Хашим Тачи“ во Виена, кажа дека Косово е безбедно место за Србите и другите народи.
На истиот настан Рама зборуваше и за Голема Албанија, кажувајќи дека е време сите да сфатат дека не постои никаков друг план за Албанците освен и Албанија и Косово да влезат во Европската Унија.
„Не знам ни меѓу најголемите националисти некој да ја заговарал голема Албанија. Тоа е користено како оправдување за етничкото чистење“- вели Рама.
Инаку, на промоцијата на книгата се појавија и противници на независноста на Косово, кои книгата за Тачи ја гледаат како пропаганда на НАТО и сојузниците на УЧК. Високиот функционер на Социјалдемократската партија на Австрија Давид Штокингер им се обрати на присутните и изрази чудење што една институција како австриската Дипломатска академија ѝ дава простор на личност со толку сомнително минато.
Тој укажа дека на Косово и понатаму е случуваат напади врз Србите и критикуваше што на собирот немало ни збор за злосторствата за време на војната, туку била прикажана само едната страна. Тој потсети дека УЧК, предводена од Хашим Тачи, и во САД беше сметана за терористичка организација.