Ребаланс на буџетот нема да има, во вонредна состојба може и без гласање да се пренаменуваат пари

Добивај вести на Viber

Ребаланс на буџетот нема да има, бидејќи се овозможува поради вонредната состојба, Владата самата да ги носи уредбите и одлуките за реалокации на парите од еден на друг буџетски корисник.

„На расходната страна на Буџетот ќе има кратења, но ребаланс нема да биде потребен. Ќе имаме поголема брзина да делуваме во вонредна состојба, па ќе се вршат побрзи реалокации на средства за да се покриваат потребите и на задравството, и на стопанството“, објасни првата финансиерка Нина Ангеловска. 

Според неа, ребалансот во најбрзо сценарио би зел две-три недели, а во нормално еден месец и повеќе, а сега сме во ситуација брзо да реагираме. 

„Вонредната ситуација ни ја дава таа флексибилност и брзина за да можеме да носиме уредби со законска сила и затоа Владата може да носи одлуки за реалокација кои во нормални околности ги гласа парламентот, за кога ќе биде потребно да се прават реалокации од еден на друг корисник. Се што ќе биде поврзано со кризата, ќе тече побрзо, ќе се скрати рокот за поврат на ДДВ. Не зборуваме за ребаланс во овој момент, туку реалокации кај буџетските корисници“, рече Ангеловска.

Реалокациите ќе бидат само во насока на справување со коронакризата.

Во третиот квартал се очекува заздравување на економијата, а во четвртиот се очекува раст. Тешко е да се предвиди како годината ќе заврши. 

„Владата е тука за фирмите и за граѓаните. Наскоро ќе се презентира нов сет на мерки за поткрепа на стопанството. Подготвени сме и за најлошите сценарија, а се надеваме на најдоброто“, рече Ангеловска.

Буџетот ќе може да одговори на сите потреби, ни едно семејство нема да остане без приход. Фокусот ќе биде да нема ни едно отпуштања. 

„Сите ќе го сносиме товарот, замолувам за трпение додека не стигне вториот сет на мерки“, нагласи министерката.

За можно намалување на плати во администрацијата, министерката апелираше да се почека вториот сет на мерки. 

„Секој треба да го сноси товарот. Тука не се работи само за намалување, туку за солидарност. А некои индустрии нема да почувствуваат проблем, дури и ќе пораснат, затоа повикав авансно да ги платат аконтациите за данокот на добивка“, нагласи првата финансиерка. 

Н.Н.Ф.