Ристовски: Ќе се санкционира секоја злоупотреба за доделување места во студентските домови

Добивај вести на Viber

Сместувањето во студентските домови ја заврши  првата фаза согласно законската постапка во која апликациите ги поднесуваа студенти од втора, трета и четврта година. Ова денеска на прес-конференција го соопшти министерот за образование и наука Спиро Ристовски одговарајќи на новинарско прашање.

Додаде дека се пристигнати над 5.000 апликации за студентските места во сите студентски домови во Македонија и оти од 19 август продолжува аплицирањето на бруцошите.

- Апелирам до раководството во студентските домови, до надлежните управители и комисијата што ќе селектира, а истовремено да порачам до јавноста дека оваа година максимум ќе дадеме од себе за целиот процес биде исклучително транспарентен и да се намалат сите шпекулациите за ургенции, влијанија и неправилна распределба на студентските места, истакна Ристовски.

Единствен критериум, рече тој, ќе биде законскиот. - Секој што ги исполнува критериумите ќе добие место во студентскиот дом, а тие што не ги исполнуваат услови нема да добијат. Доколку се констатира дека некој ја злоупотребил својата позиција ќе биде соодветно санкциониран, а не е исклучено и негово разрешување, истакна Ристовски.