Саудиска Арабија станува лидер во производство на „зелената“ енергија?

Добивај вести на Viber

Покрај тоа што е лидер на нафтениот пазар, Саудиска Арабија се повеќе се заложува за развој на еден нов енергетски пазар-сончевата енергија, пишува Фајненшл Тајмс. Весникот пренесува дека кралството планира да инвестира во изградба на соларни централи и да извезува енергија. „Плановите на Владата се многу амбициозни и се потребни години за да бидат исполнети. Потенцијалот е многу голем и веруваме дека Саудиска Арабија ќе стане еден од најголемите производители на сончевата енергија ", коментира официјален претставник на власта во земјата, кој побарал анонимност. Кралството планира да инвестира повеќе од 100 милијарди долари во обновливите извори на енергија, особено во соларните паркови. Со плановите земјата им дава пример и на другите земји во регионот. Катар исто така најави дека планира да ги искористи обновливите извори на енергија, за да се претвори во извозник на електрична енергија. Една од идеите на арапските држави е нивните електрични мрежи да се поврзат со проектот „Desertec“ - соларна централа, која се планира да биде поставена во пустината Сахара и да испорачува струја за Европа. Земјите на Стариот континент имаат огромна потреба од извори на обновлива енергија за да ги исполнат своите цели за намалување на штетните емисии на гасови и користење на обновливите извори на енергија, сметаат државите од Блискиот и Средниот Исток. Според нив, владите во Европа ќе бидат многу отворени кон увоз на обновлива енергија по конкурентни цени. Поради традиционалната зависност на Саудиска Арабија од фосилни горива, сепак некои аналитичари се скептични за плановите таа да стане светски лидер во секторот на "зелената" енергија. Покрај тоа, поврзувањето на мрежите на земјата со проектот „Desertec“ е процес кој се соочува со тешки предизвици поврзани претежно со големите растојанија. Аналитичарите предупредуваат дека ако земјите во регионот на Персискиот залив не ја менуваат својата политика и не најдат алтернативни извори на енергија, по 20 години тие ќе станат нето увозници на гориво. Затоа не се изненадување амбициите за развој на новите видови на енергија во овие држави и покрај високата цена на современа опрема.