Добивај вести на Viber
Предлог Програмата за новата фасада на зградата на енергетската компанија за пренос на струја МЕПСО, денеска ќе се најде и пред советниците на општината Центар. На закажаната седница на Советот на општината, за оваа точка од дневниот ред, се очекува жолчна расправа меѓу советниците од владејачкото мнозинство и советниците од опозицијата. Како и досега, и овој пат опозициските советници остро ќе реагираат и ќе гласаат против промената на фасадата на МЕПСО. Тие во неколку наврати изјавуваа дека се против трошењето на пари за барокни фасади, и затоа не ја поддржаа ниту промената на фасaдата на Владата и на Министерството за правда.
Иако, првично барокната фасада на МЕПСО требаше да биде надополнета само со фигури на лавови, сега според документите што компанијата ги доставила до општината, објектот ќе биде збогатен со повеќе антички столбови, па така подобро да се вклопи во амбиентот, односно во проектот “Скопје 2014”. Но, најверојатно лавовите ќе отпаднат од комбинацијата. Освен што комплетно ќе се менува стаклената фасада, според архитектонското решение, објектот ќе добие и нов стилизиран покрив.
![MEPSO (2)](http://faktor.mk/wp-content/uploads/2013/01/MEPSO-2.jpg)
Засега останува непознато колку ќе чини барокната фасада на МЕПСО, тоа ќе се знаело во март за кога е закажано отворањето на понудите од тендерот.
За објектите да се вклопат во амбиентот во градскиот центар, речиси сите фасади е предвидено да бидат во неокласицизам. Се почна со зградата на Пелистер, а ќе продолжи со објектот на Тренд, Сити Галери, Стар Метропол и објектите по должина на улиците Македонија, Димитрие Чуповски, Никола Вапцаров, 11-ти Октомври и Максим Горки. Промената на фасадите во неокласицистички стил е дефинирана со ДУП-от Мал Ринг, план кој досега токму поради проектот “Скопје 2014” само за една година претрпе десетици измени, за што на неколку пати остро реагираше стручната јавност, коментирајќи дека не е добро и професионално во толку краток рок да се прават брзи промени на еден урбанистички план. Можеби хартијата трпи се, но не и архитектурата, изјавуваа дел од архитектите, кои особено ја критикуваа промената на фасадите на објектите што се од познати автори, наградувани за архитектонскиот изглед и што се од значење на скопјани.
По фасадите, се подготвува и теренот за градбите на гркот Кондоминас
![Oficerski i hotel (2)](http://faktor.mk/wp-content/uploads/2013/01/Oficerski-i-hotel-2.jpg)
Барокната еуфорија нема да застане само со промената на фасадите на објектите. Деновиве интензивно се расчистува теренот на плоштадот Македонија за изградбата на Офицерскиот дом и луксузниот хотел, што ќе ги гради грчкиот бизнисмен Димитрис Кондоминас, објекти кои нормално со својот изглед ќе бидат во склоп на “Скопје 2014”. Се работи за локацијата каде што сега се наоѓа паркингот на ЈП “Градски паркинг” и велосипедскиот пункт. Парцелата од 6.308 метри квадратни, грчкиот бизнисмен во 2011 година ја купи за 630.000 евра и најави дека инвестицијата ќе изнесува околу 50 милиони евра.Според маркиците од Деталниот урбанистички план Мал Ринг, двата објекта треба да бидат со максимална висина од 29 метри, а хотелот треба да има четири ѕвезди. Новиот газда е должен дел од Офицерскиот дом без надоместок да го отстапи во функција на градските власти, и тој ќе се користи како резиденција на скопскиот градоначалник, а во него ќе се смести и матичната служба.
Гркот Кондоминас во својата земја важи за контроверзен и мистериозен бизнисимен, а македонската канцеларија за правни совети “Транспаренси Македонија” тврди дека е вклучен во корупцискиот скандал за “Дојче телеком”, во 2011 година. Грчкиот бизнисмен имаше и земјиште кај хотелот “Александар палас”, каде што требаше да гради трговски и бизнис центaр, но идејата пропадна бидејќи голем дел од земјиштето беше вратено со денационализација, па подоцна парите за земјиштето му беа вратени. Грчките медиуми пак, неговите инвестиции во Македонија ги коментираа како политички обид на тогашната грчка власт, за промена на македонскиот став за спорот за името.
Ј.С