СДСМ за 104 гласа загуби четири градоначалници во вториот круг
Објавено во: Македонија 01 Ноември, 2021
Љупчо Папазов е нов градоначалник на Кочани, а кандидатот на ВМРО-ДПМНЕ победи со само 16 гласа разлика против Николчо Илијев од СДСМ. Папазов освои 8.697 гласа, додека неговиот конкурент Илијев имаше 8.681 гласа.
Славе Андонов од ВМРО-ДПМНЕ го победи актуелниот градоначалник на Василево од редовите на СДСМ, Марјан Јанев, со резултат 3.332 - 3.306, или со разлика од 26 гласови во корист на новиот победник.
Златко Ристов за 23 гласа повеќе му донесе победа на ВМРО-ДПМНЕ против Благој Илиев од СДСМ во Конче. Бошко Цветковски, исто така од ВМРО-ДПМНЕ, имаше 39 гласа повеќе од Ацо Велковски во Лозово.
Според тоа, може да се каже дека за 104 гласа, СДСМ загуби четири актуелни градоначалници во вториот круг од локалните избори.
Сепак во Демир Капија тесна победа оствари Лазар Петров од СДСМ со 1.323 гласа, 36 гласа повеќе од Андон Донев од ВМРО-ДПМНЕ.
Тесно победи и Јовица Илијевски од ВМРО-ДПМНЕ со само 36 гласа повеќе од „независниот“ Енвер Пајазити во Брвеница. Првиот имаше 3.486, а вториот 3.450.
А.К.