Се стега обрачот за пушачите: За недозволено пушење ќе казнуваат и полицајци и инспектори

Добивај вести на Viber

Пратениците ги изгласаа измените во законот за пушење, со што отсега казни ќе може да изрекуваат и полицајците и инспектори на УЈП, штом фатат граѓани кои пушат на недозволено место. Според опозицијата законот се спроведува селективно,а измените имаат само една цел, да го полнат испразниот буџет.Тие посочија дека измените се носат без никаква анализа, а н е изготвена ниту статистика за тоа колку лица и правни субјекти се казнети досега, колку објекти се затворени и во кои делови на земјата, но и како забраната за пушење влијае врз прометот. Од друга страна пак за минстерот за здравство,  Никола Тодоров,  помала била шансата да бидат фатени граѓани што пушат каде тоа не е дозволено, откако повеќе инспекции ќе изрекуваат санкции. „Ако има поголем број инспекции поголема е веројатноста дека граѓаните нема да бидат фатени. Автоматски помал ќе биде бројот на казните. Мислам дека нивниот број нема да се зголеми туку дека ќе остане ист. Казна се изрекува на оној што не го почитува законот. Со овој закон не се зголемуваат казните“,  истакна Тодоров кој смета дека измените ќе влеат страв кај пушачите, па ова ќе придонесе за подобро здравјето на граѓаните. Измените предвидуваат инспекциски надзор да го вршат Државниот пазарен инспекторат, Државниот санитарен и здравствен инспекторат, Државниот инспекторат за труд, Управата за јавни приходи и Министерството за внатрешни работи. Државниот просветен инспекторат пак ќе може да врши инспекциски надзор во училиштата и универзитетите, научните институции, ученички и студентски домови,но и  јавни или приватни воспитно – образовни и згрижувачки установи и игротеки. Оние што ќе бидат фатени ќе бидат казнети со 150 до 300 евра.  Измените и на овој закон пратениците ги донесоа во скратена постапка.