Штедиме, а не вложуваме: Над 5,6 милијарди евра во домашните банки

Добивај вести на Viber

Денес се обележува Светскиот ден на штедењето, а банките со новите понуди и погодности се обидуваат да привлечат што поголем број штедачи во услови на ниски камати.

Македонските граѓани во последните десетина години се’ повеќе штедат во банките, а вкупните депозити растат со стапка на околу осум проценти, што придонесе за значајно зголемување на штедењето од околу 10 процентни поени од БДП, достигнувајќи 55 проценти од бруто-домашниот производ, објави гувернерката на НБРМ Анита Ангеловска-Бежоска.

Карактеристика за сите земји во Централна и Југоисточна Европа, каде што стапката на вкупното домашно штедење е на ниски околу 17 проценти, а Македонија е блиску до тој просек, посочи гувернерката Ангеловска-Бежоска.

Нивото на штедните влогови е високо, изнесува 345 милијарди денари, односно 5,6 милијарди евра, информираше министерот за финансии Драган Тевдовски.

По повод Светскиот ден на штедењето наградени се 38 банкарски службеници. За првпат добија специјално за оваа намена изработени статуетки, кои ќе станат традиционални при секое одбележување на овој ден.

Светскиот ден на штедењето е воспоставен на 31 октомври 1924 година, на собир на банкарите во Милано, кога е основан и Меѓународниот институт за штедење.