Швајцарија против размена на даночни информации со ЕУ

Добивај вести на Viber

Швајцарија нема потреба да ја разгледува автоматската размена на информации за даночните власти во Европската унија, имајќи предвид дека не е членка на Унијата, изјави денеска швајцарскиот претседател Ули Маурер во интервју за весникот „Матан диманш“.

Швајцарија и Австрија по последно време се најдоа под зголемен притисок на Унијата да се откажат од тајноста на банкарските податоци, откако Луксембург се согласи од 2015 година да почне да ги открива информациите за клиентите од ЕУ. Унијата сака тоа да стане стандард, со цел да се стави крај на затајувањето данок.

На прашањето дали Швајцарија и натаму има избор по тоа прашање Маурер изјави; „Секако. Ова е опасен момент за Швајцарија, но за разлика од Луксембург, ние не сме членки на Унијата, а освен тоа ги почитуваме стандардите на Организацијата за економска сорабока и развој. Нема потреба сега да ја менуваме својата стратегија“.

Иако швајцарската министерка за финансии Евелин Видмер Шлимф во неколку интервјуа овој викенд укажа дека нејзината земја можеби ќе мора да ја разгледа идејата за автоматска размена на информации доколку сака да стави крај на спорот со ЕУ во врска со затајувањето данок, претседателот Маурер нагласи дека само внатрешните притисоци би можеле да ја наведат Швајцарија да ја разгледа својата политика.

- Ние веќе направивме неколку отстапки. Последната се однесуваше на спогодбата, која ја потпишавме со САД, рече Маурер, што се однесува на договорот според кој американските даночни обврзници, кои имаат сметки во Швајцарија нема да ги избегнат фискалните обврски во САД.