СИТЕ НЕВИСТИНИ НА ВУЧИЌ: Во цел мандат само во 9 отсто случаи ја зборувал вистина
Објавено во: Балкан 01 Јуни, 2018
Српскиот претседател, Александар Вучиќ во едногодишниот мандат само во девет отсто изјави зборувал вистина и повеќе пати ги пречекорил претседателските овластувања, објавија српски медиуми пренесувајќи анализа на Вистиномер.
Повеќе од 90 отсто изјави на Вучиќ во првата година од мандатот биле невистинити, стои во анализата.
„Од вкупно 33 изјави само девет отсто биле вистинити“- наведува Вистиномер и додава дека во тој период Вучиќ исполнил само шест отсто ветувања.
Во првата година од мандатот имало бројни пречекорувања на овластувањата – од изборот на премиерката Ана Брнабиќ до утврдување мерки за популистичка политика, се вели во анализата на Вистиномер.
Меѓу останатите изјави на Вучиќ, илустриран е и примерот со патишта.
„Се испостави дека ветувањето на Вучиќ дека до 2017 година ќе имаме повеќе километри автопатишта од Хрватска не беше точно. Се покажа дека Србија во 2017 година има ист број километри како Хрватска во 2003 година. И недостигаа нешто повеќе од 550 км за да се изедначи под услов Хрватска да престане да гради патишта“- наведува Вистиномер.
Вучиќ тврдел дека растот на економијата во државата е поголем од европскиот просек, а се увидело дека во тој момент Србија имала речиси двојно помал раст од просекот во државите од ЕУ. Тој рекол дека Србија во 2016 година имала најголем економски раст на Западен Балкан, но во споредбена анализа се укажува дека поголема стапка на раст имале во Хрватска, Албанија и во Косово.