СЈО: УБК нема технички ни човечки капацитет да исполни судска наредба

Добивај вести на Viber

„СЈО денеска доби наредба од Основниот суд Скопје 1, која е добиена по повод наше барање за да ни бидат доставени сите податоци за броевите кои што ги имаме маркирани во УБК во периодот кој што назад е предмет на наш интерес. Тие податоци се сомневаме дека се наоѓаат и во моменталните системи кои што ги има УБК и нашата цел е да ги обезбедиме токму овие податоци, за да видиме дали тие податоци прво се навистина таму и понатаму што можеме да утврдиме од нив“, вака ја образложи денешната „посета“ на Управата за безбедност и контраразузнавање специјалната јавна обвинителка Ленче Ристовска.

Обвинителката Ристовска рече дека од досегашното постапување на нивно исклучително жалење е што Управата не само што немала волја да постапи по судската наредба, туку манифестира и недостаток и на технички и на човечки капацитети за исполнување на судска наредба.

Од СЈО  не сакаа во овој момент да коменираат дали тоа е намерно или не е намерно.

„Единствено сме разочарани од тоа што со ваков тип на државна институција се соочуваме со немање на човечки и технички капацитети да се реализира судска наредба и еве веќе подолг период сме тука и како што кажа и специјалната јавна обвинителка Катица Јанева тапкаме буквално во место, односно немаме никаков напредок во однос на одземање на податоците кои што се предмет на судската наредба“, рече Ленче.

СЈО апелираше до сите медиуми да бидат внимателни со употреби на имиња на компании кои можат да помогнат во истрагата, бидејќи имаат соработка со сите компании и не сакаат да биде нарушен угледот на некоја од нив.

Повеќе информации СЈО најави за текот на утрешната прес конференција која ќе се одржи во 11 часот.

Јанева пак се надоврза и рече дека таа и тимот остануваат да дежураат во УБК а за неа рече оти се додека може физички да издржи ќе остане таму, па ако треба и до јануари но ќе ги добие податоците.