Скопјани ќе добијат осум нови мостови

Добивај вести на Viber

Cо цел да се олесни движењето на граѓаните и да се скрати патувањето меѓу двете страни на реката Вардар во Скопје ќе се изградат нови осум моста, пишува Дневник.  Некои ќе бидат пешачки, некои за возила и ќе се градат откако Градот ќе ги заврши двата моста за пешаци на двата краја од Скопје што неодамна ги најави, а веќе ги распиша и огласите за избор на идејно решение. Третиот мост е за Аеродром. Овој мост кој е предвиден да биде сообраќаен, ќе се гради кај салата МЗТ, но кога градскиот буџет ќе биде доволно силен за такво нешто. Во населбата Лисиче, освен еден пешачки мост, според ГУП-от е зацртан и сообраќаен мост кај улицата Индустриска, кој треба да ги поврзе Лисиче и Маџари. Во Генералниот урбанистички план и натаму се предвидени клучните мостови што се дел од примарната сообраќајна мрежа, тој кај Владата и во Маџир Маало. Мостот кај Владата е продолжение на булеварот Kлимент Охридски, кој откако ќе ја премости реката треба да минува во тунел под Kалето и да се поврзе со улицата Никола Kарев во Чаир, која исто така е предвидена да прерасне во булевар од примарната мрежа, односно урбан автопат. Идејата за урбани автопати каде што може безбедно да се вози со поголема брзина е стара повеќе децении, од планот од 1965 година. Оттогаш е и идејата за изградба на булеварот Kрушевска република, кој треба да мине со мост преку Маџир Маало и треба да служи како брза попречна врска меѓу северниот и јужниот дел на градот, пишува Дневник. Од Градот велат дека доколку се изгради булеварот, во секој случај ќе се изведе и мостот. Мост што има шанси поскоро да биде изграден е тој што е предвиден во Kарпош- продолжение на улицата Љубљанска, која поминува покрај „Сити мол“. Во Kарпош е планиран и друг мост преку Вардар, како продолжение на булеварот Илинден. Овој булевар е зацртан преку Влае, покрај брегот на реката Лепенец, до Волково, каде што треба да излезе на северната обиколница. Меѓутоа, во тој реон нема тесно грло поради постоење на на мостот „Обединети нации“ и поради вториот мост во Хром, кои значително го растоваруваат сообраќајот.