Славчо Попоски открива дали ќе имаме снег за Нова година и во првите денови од 2021

Добивај вести на Viber

Оваа Нова година ќе помине без снег и снежна покривка барем во градовите, додека снег веќе има на повисоките планински места низ државава, вели метеорологот Славчо Попоски. 

Објаснува дека за време на новогодишната ноќ ќе имаме променливо облачно време, можни се и слаби локални врнежи од дожд, а на планините слаб снег. Температурата ќе се движи во интервалот од -2 до 6 степени. 

„На првиот ден од новата 2021 година исто така ќе има услови за слаби локални врнежи од дожд и снег на планините. Максималните дневни температури на првиот ден од новата година ќе се искачат во интервалот од 7 до 14 степени, што значи и понатаму очекуваме натпросечно високи температури на воздухот. Според моменталните анализи со кои располагаме, без снег ќе ги поминеме и Божиќните празници. Но, со оглед дека има време до тогаш, промени во прогнозата се сѐ уште можни, па се надеваме дека конечно овој Божиќ децата и многу други од нас ќе му се радуваат на снегот и на снежната покривка. Подетални и посигурни информации за временската состојба за Божиќните празници ќе имаме понатаму“, рече Попоски. 

Тој додава дека засега зимата е натпросечно топла, а температурите се за 3 или 4 степени повисоки од просечните. 

„Инаку оваа 2020 година помина без некој позначајни случувања во поглед на временската состојба кај нас, што значи дека немавме некои екстремни појави, како што се зачестена појава на пожари во текот на летниот период, екстремно ниски и високи температури на воздухот, појава на поплави и големи временски непогоди. Сѐ беше во границите на нормалата за нашиот регион“, вели Попоски. 

Ноември оваа година бил најтоплиот ноември на планетата досега. Тоа е специфичен податок по кој ќе се памети оваа 2020 година. 

Сања Атанасовска