Случај Фени: Доверителите го одобрија планот на ГСОЛ

Добивај вести на Viber

Собранието на доверители го прифати денеска планот за реорганизација на Фени кој го достави ГСОЛ. Ова е втор пат планот на инвеститорот да го одбрат доверителите

Од ГСОЛ велат дека со денешното гласање,ФЕНИ Индустри е само еден чекор од конечното повлекување од стечај. По позитивното гласање од Собранието на доверители, судот исто така се очекува да го потврди планот со одлука.

"Помина една година откако Фени отиде во стечај, а во изминатите 10 месеци откако ГСОЛ/ Еуроникел потпиша договор за обработка на никел, не само што обезбедивме континуирано функционирање на фабриката, туку и во пракса покажавме дека го поседуваме потребното знаење, средства и ресурси кои се неопходни за фабрика како ФЕНИ да преживее, но уште поважно да продолжи да ја развива и да ја креира својата иднина", изјави Маркос Камхис, директор на ГСОЛ.

Камхис вели дека со реализацијата на планот за реорганизација ќе започне проширување на производството, почнувајќи од отворањето на втората печка и неопходната надградба на производството.

"Нашиот план ќе се фокусира на зголемување на производството, отворање нови пазари, обезбедување сигурност за вработените и враќање на ФЕНИ на европската и светската карта како еден од најголемите процесори на фероникел", додаде Герасим Кујунџиев, директор на Еуроникел ДООЕЛ Скопје.

Фактор веќе објави дека денеска судот во Велес повторно одлучува за планот за реорганизација на „Фени“, откако таква одлука донесе Апелациониот суд.

Вчера тужба против „Кунико Рисорсис“ од Холандија, „Кунико Маркетинг ФЗЕ“ од Обединетите Арапски Емирати и против Јусуф Миракхмедов и Маниш Агарвал, одговорни лица во Фени поднел стечајниот управник на комбинатот Мирослав Анастасиевски. Според тужбата тие го оштетиле „Фени“ за 51 милион долари и со тоа придонеле компанијата да оди во стечај.