СНЕЖНО НЕВРЕМЕ ВО ХРВАТСКА: Утрово се регистрирани повеќе сообраќајки
Објавено во: Балкан 06 Април, 2021
Снежно невреме ја зафати Хрватска.
Снег има во Загреб, но и во другите делови на државата. Температурите на некои места паднаа под нулата. Дожд и снег паѓаат на Јадранот на север, а во Далмација се очекува невреме, поради што прекинати се и некои фериботски линии. Од утрово се регистрирани повеќе сообраќајни несреќи, а властите повикуваат на претпазливост. И за утре во Хрватска е најавено слично време. Порталот Severe Weather Europe пишуваше дека стариот континент го очекува „многу драматична промена на времето за велигденските празници“. Како што е наведено, „историскиот арктички студ“ најпрво ќе ги погоди Обединетото Кралство и Ирска, а потоа ќе се прошири во Централна Европа, Медитеранот и на Балканот. Порталот потсетува дека во втората недела од април, температурите претежно се зголемуваат и вегетацијата цвета, но дека студениот бран што доаѓа овој април може да го направи еден од најстудените во одредени делови на Европа. Што се однесува до Балканот, најавите се исто така драматични. Порталот дури предвидува помеѓу 20 и 30 см снег во одредени делови на полуостровот.