Студентскиот парламент лут на опозицијата – побарала бесплатен превоз за студенти?

Добивај вести на Viber

Откако пропадна обидот на опозицијата , преку советниците во Град Скопје да издејствува воведување бесплатен превоз за студентите, се огласи Студентскиот Парламент на Универзитетот „Св. Кирил и Методиј“-Скопје. Оттаму велат дека оваа реформа треба да ја побараат студентите, а не советниците. „Како легитимно, претставничко тело на студентите, но и како главни иницијатори за оваа промена, во согласност со волјата на студентите, им се заблагодаруваме за заложбите. Оваа наша, едногодишна борба треба да остане во рацете на студентите. Ова не е начин за добивање на дневно политички поени, туку е вистинска потреба на секој студент. Затоа оставете не на наш студентски начин да ја издејствуваме оваа реформа“, стои во соопштението од СПУКМ. Од Студентскиот Парламент велат дека тие биле оние што први почнале со кампањата за намалување на цените на јавниот превоз за студентите на УКИМ. „Паралелно на институционалното лобирање, спроведувме и кампања за да го дознаеме мислењето на студентите на оваа тема. Еден месец делевме анкетни прашалници по сите факултети на УКИМ и студентски домови. Над 15.000 студенти ги пополнија анкетните листови, а резултатите упатуваат дека повеќе од 70 отсто се за намалување на цената на месечниот билет на јавниот превоз за студентите“, стои во соопштението од СПУКМ. Вчера и мнозинството советници од редовите на ВМРО најави дека нема да ја поддржат иницијативата на Сојузот за иднината, студентите да се возат бесплатно во градски автобус. Според нив главната причина заради која ќе гласаат против е што иницијативата требало да се упати до Министерството за образование, а не до Град Скопје. Тие притоа посочија дека од воведувањето бесплатен превоз бенефит нема да имаат студентите од дисперзираните студии.

Од опозицијата пак сметаат дека е неопходно студентите да добијат бесплатен јавен превоз секој ден, освен во недела и за државни празници и тоа од први октомври до 30 јуни, од 8 до 21 часот.