Судиите побараа поголема плата или ќе се приклучат на штрајковите
Објавено во: Македонија 08 Април, 2022
Управниот одбор на Здружението на судиите донел заклучок да побара од Владата да им бидат зголемени платите за 15 отсто во наредните две недели или ќе стапат во предупредувачки штрајк.
Во моментов протестираат или во најава на штрајк се администрацијата, просветните работници, вработените во АД „пошта“ и матичните лекари.
„Здружението на судии бара договорените измени за зголемување на коефициентот за пресметка на платите најмалку за 15 отсто да се усвојат во најкраток можен рок а не подоцна од две недели, а исто така да бидат усвоени измените на законот за платите на судиите најдоцна до 30 јуни 2022 година“, се вели во заклучоците.
Тие веќе се испратени до министерот за правда Никола Тупанчески и до Владата, а предупредувачкиот штрајк би се одржал на 28 април од 11-11.30 часот.