Тачи и Дачиќ во Брисел – постигнат договор за изборите и за нормализација на односите

Добивај вести на Viber

Премиерите на Косово и Србија, Хашим Тачи и Ивица Дачиќ, во Брисел се  договорија за новите чекори во однос на изборите и за нормализација на односите, соопшти високиот претставник за надворешна политика на ЕУ , Кетрин Ештон. Како што се наведува во соопштението, Ештон е задоволна од договорот, а за деталите од продолжувањето на изборите ќе се грижат властите во Приштина. Тема на разговорите биле и Бриселскиот договор и продолжувањето на неговата имплементација, а како што заклучува Ештон „ќе биде забрзан напредокот со цел да се оствари она што го посакуваме“. Двајцата премиери се согласија да продолжат да работат врз Спогодбата за нормализирање на односите , а и двете страни се подготвени да ги исполни задачите што се пред нив, се вели во соопштението на Ештон. Претходно централната изборна комисија ги поништи изборите во три избирачки места во Северна Митровица и донесе одлука да се повтори гласањето. Според косовскиот премиер локалните избори на 3 ноември биле успешни и ја докажале вредноста и легитимноста на договорот меѓу Белград и Приштина, изјави тој во Брисел пред состанокот со Кетрин Ештон. Изборите беа важен европски тест за Косово и кој е успешно положен, смета Тачи. Дачиќ пак ги повика косовските Срби што помасовно да излезат на изборите на трите изборни места во Косовска Митровица. Таму неделните локални извори беа прекинати поради насилни инциденти.