Трамп ја лансираше „Ѕвездената порта“, проектот вреден 500 милијарди долари предизвика берзански земјотрес

Добивај вести на Viber

На неговиот втор ден на функцијата, американскиот претседател Доналд Трамп ги собра водечките технолошки тешкаши за проект кој има за цел да обезбеди победа во судирот со Кина на полето на вештачката интелигенција.

Со цел да и се обезбеди на САД водечка позиција во глобалната технолошка трка, новоименуваниот претседател на САД на вториот ден од неговиот мандат најави мегаломански проект вреден дури 500 милијарди долари во областа на вештачката интелигенција.

Проектот наречен „Stargate“ ги обединува технолошките гиганти како OpenAI, Oracle и SoftBank, што веднаш предизвика потрес на берзата и пораст на акциите на овие компании, објавија американските медиуми.

Трамп собра импресивен тим на лидери од технолошките гиганти во Белата куќа - извршниот директор на SoftBank Масајоши Сон, шефот на OpenAI Сем Алтман и ко-основачот на Oracle Лери Елисон - кои презентираа детали за амбициозниот план со почетна инвестиција од 100 милијарди долари и план да инвестираат 100 милијарди долари во следните четири години.

„Старгејт“ ќе изгради „физичка и виртуелна инфраструктура за напојување на следната генерација на вештачка интелигенција“, вклучително и центри за податоци низ целата земја, истакна Трамп. Елисон рече дека првиот проект на групата од еден милион квадратни метри е веќе во изградба во Тексас.

Oracle соопшти дека проектот Stargate „ќе обезбеди американско лидерство во вештачката интелигенција, ќе создаде стотици илјади работни места во САД и ќе генерира огромни економски придобивки за целиот свет“. Овој проект не само што ќе ја поддржи реиндустријализацијата на Соединетите држави, туку ќе обезбеди и стратешка способност за заштита на националната безбедност на Америка и нејзините сојузници“.

Проектот „Stargate“, со својата финансиска тежина и вклучените актери, несомнено претставува демонстрација на решителноста на САД технолошки да ја води трката за вештачка интелигенција, иако останува да се види како овој амбициозен план ќе се реализира во пракса и дали ќе обезбеди посакуваната доминација во развојот на вештачката интелигенција, сметаат експертите.

Како што е објавено на веб-страницата на OpenAI: „Почетните капитални инвеститори во Stargate се SoftBank, OpenAI, Oracle и MGX. SoftBank и OpenAI се водечки партнери на Stargate, при што SoftBank има финансиска одговорност, а OpenAI има оперативна одговорност. Водачот на SoftBank Масајоши Сон ќе биде претседател на новата компанија.

Како дел од Stargate, Oracle, NVIDIA и OpenAI тесно ќе соработуваат за да го изградат и управуваат овој компјутерски систем. Ова се надоврзува на длабоката соработка помеѓу OpenAI и NVIDIA која датира од 2016 година, како и поновото партнерство помеѓу OpenAI и Oracle. Дополнително, проектот се надоврзува и на постојното партнерство на OpenAI со Microsoft. OpenAI ќе продолжи да ги зголемува трошоците за Azure додека продолжува да работи со Microsoft на овој дополнителен компјутерски систем за обука на водечки модели и испорака на производи и услуги.

Во соопштението се заклучува: „Сите со нетрпение очекуваме да продолжиме да градиме и развиваме вештачка интелигенција, особено AGI, за доброто на целото човештво. Веруваме дека овој нов чекор е клучен на тој пат и ќе им овозможи на креативните луѓе да разберат како да користат вештачка интелигенција за да го подигнат човештвото“.

Проектот Stargate е именуван по култниот научно-фантастичен филм од 1994 година и популарната телевизиска серија, во која Stargate е уред за меѓуѕвездена телепортација или патување помеѓу далечни планети.

Патем, во понеделникот, Трамп ја укина извршната наредба издадена од поранешниот претседател Џо Бајден во 2023 година, која имаше за цел да ги следи и регулира ризиците со вештачка интелигенција.

Најавата за проектот Stargate ги зголеми технолошките акции, но исто така покрена прашања за неговото долгорочно влијание врз пазарите и геополитиката. Економските аналитичари сметаат дека проектот Stargate може значително да ја зајакне американската економија. Но, растечката потрошувачка на енергија на инфраструктурата за вештачка интелигенција покренува прашања за одржливоста, додека фокусот на Трамп на фосилните горива сигнализира поинаква насока од политиките на неговиот претходник, кој ги нагласи обновливите извори на енергија.