Ципрас побара ММФ да остане надвор од третиот спасувачки пакет за Грција
Објавено во: Балкан 21 Декември, 2015
Грчкиот премиер Алексис Ципрас побарал ММФ да остане надвор од третиот пакет за спас на Грција, пренесе британскиот весник „Фајненшл тајмс“.
Во интервју за весникот Ципрас вели дека има проблем со неконструктивното однесување на Меѓународниот монетарен фонд во однос на економските прашања поврзани со Грција.
„Фајненшл тајмс“ коментира дека со својата позиција грчкиот премиер и ја пренесува на еврозоната целосната одговорност за реализација на бараните реформи од Атина во замена за третата финансиска помош во износ од 86 милијарди евра.
„Сметаме дека по шест години на управување на оваа вонредна кризна ситуација Европа веќе ја има институционалната способност да се справи успешно со внатрешните европски прашања“, изјавил Ципрас за весникот.
Весникот коментира дека тврдењата на грчкиот премиер по секоја веројатност ќе ја налутат германската влада, која секогаш настојувала ММФ да остане во спасувачката програма за Грција.
Во интервјуто Ципрас ја потврдува намерата на грчката влада да ги почитува преземените обврски кон доверителите со „цел враќање на националниот суверенитет во економската политика“.
„Сметаме дека колку побрзо излеземе од програмата, толку е подобро за земјата“, наведува грчкиот премиер и додава дека до јануари земјата ќе реализира над 70 отсто од економските мерки утврдени во договорот со доверителите.
Ципрас е оптимист дека земјата ќе може да добива кредити од меѓународните пазари на капитал „пред крајот на 2016 година“.
Според него реализацијата на договорот со доверителите е „тежок, но подобар од било кој друг избор“.
ММФ инсистира на кратење на пензиите - нешто што владата во Атина се обидува да го избегне, забележува весникот. Од Фондот се скептични и за најавените предвидувања од Грција за зголемување на приходите во 2016 година.