ТУРЦИЈА СО ПОВИК ДО ТУРИСТИТЕ: Дојдете слободно и уживајте во нашата земја!
Објавено во: Балкан 21 Јули, 2016
Владата на Турција соопшти дека воведувањето на вонредната состојба не е никаква пречка за престој и одмор на туристите во таа земја.
Како што се наведува во соопштението на Министерството за култура и туризам, туристите кои планираат престој во таа земја немаат никакви безбедносни пречки за престој на било која дестинација или летувалиште поради воведената вонредната состојба.
Турскиот претседател Ердоган вчера вечерта прогласи тримесечна вонредна состојба во земјата после обидот за пуч.
Министерството за култура и туризам наведува дека вонредната состојба претставува пакет мерки кои ќе се спроведат во рамки на уставните закони поради зголемена безбедност со цел државата да се избори со заканите по човечките права и слобода на народот.
„Наведениот пакет на мерки не содржи било какви ограничувања на основните човечки права и слободи. Мерките за безбедност кои ќе се применат нема ни на кој начин да влијаат на туристите кои ќе ја посетат Турција ниту на секојдневието на турските државјани, а исто така нема да претставува ниту пречка за нормално функционирање на воздушниот сообраќај и меѓународно движење низ земјата“, пишува во соопштението.