Ванхауте му порача на Груевски да прифати одговорност и да чека истрага
Објавено во: Македонија 28 Април, 2017
Белгискиот дипломат Питер Ванхауте испрати отворено писмо до лидерот на ВМРО ДПМНЕ.
Во него тој посочува дека вчерашниот ден ќе биде запамтен како уште еден „црн понеделник“ а партијата ВМРО ДПМНЕ е партија која треба да сноси најголема одговорност.
„Дозволете ми да бидам јасен: употребата на насилство за да се спротивставите на демократските процедури во парламентот е неприфатливо.
Свесен сум дека ВМРО се уште е најголема партија во парламентот, но тоа не значи ништо ако не се во можност да формираат мнозинство. И тоа е токму она што вие, г-дин Никола Груевски, и вашата партија, треба да го прифатите: тоа што победивте на изборите не значи дека ќе ја освоите власта. Денес: вие сте главната опозициска партија во парламентот, бидејќи го изгубивте мнозинството во парламентот и ја загубивте власта. И без насилство некогаш ќе се променеше тоа“, пишува белгискиот посредник.
Ванхауте се осврнува и на утринскиот прес на Груевски кој го нарече срамен.
„Вашата последна прес конференција беше срамна, недостојна за лидер на демократска партија. Наместо да ги браните вистински демократски вредности, видовме демократија која се распаѓаше вчера во рацете на вашите партиски членови и група на гангстери“, оценува посредникот.
Според Ванхауте изборот на нов претседател, со цел да ја врати демократијата во Македонија е совршено легално направен. Ниту еден суд не може да го оспорува тоа бидејќи главната цел била да се врати демократијата.
Ванхауте на првиот човек на ВМРО ДПМНЕ на крај му порачува да прифати одговорност и да чека истрага.