(ВИДЕО) ЦИПРАС ГО ПОСЕТИ МАТИ: Еве како го дочекаа локалните жители
Објавено во: Балкан 30 Јули, 2018
Грчкиот премиер, Алексис Ципрас денеска ги посети Мати и Рафина.
Ципрас на Твитер напиша дека разговарал со „граѓаните, инженерите, војниците, пожарникарите и доброволците“.
Ова се најтешко погодените места во пожарите кај Атина, кои однесоа 91 живот.
Во краткото соопштение од неговиот кабинет, се наведува дека средбата на грчкиот премиер со локалните власти и граѓаните во таа област траела околу еден час.
Претходно, министерот за одбрана Панос Каменос го посети уништениот регион при што го нападнаа локалните жители кои ја критикуваат власта поради начинот на кој се справи со пожарите.
Противпожарната служба на Грција соопшти синоќа дека новиот биланс на пожарите кои ја опустошија околината на Атина е зголемен на 91, а 25 лица се водат како исчезнати.
Пожарите кои минатата недела ја зафатија Грција се опишуваат како најсмртоносни во Европа од 1900 година, соопшти Центарот за истражувања на епидемии и катастрофи во Брисел.