(ВИДЕО) ПРОТЕСТИ ГО ТРЕСАТ „ГУГЛ“: Вработени ширум светот ги напуштаат работни места
Објавено во: Свет 01 Ноември, 2018
Стотина вработени во компанијата ,,Гугл” излегоа од своите канцеларии ширум светот во знак на протест поради благата реакција на компанијата кон одредени шефови обвинети за сексуално вознемирување. ,,Њујорк тајмс” минатата недела објави натпис со детали околу обвинувањата на една жена за сексуално вознемирување против творецот на ,,Гугл” андроидот Енди Рубин.
Вработените на ,,Гугл” ширум светот денес ги напуштија своите работни места во 11 часот во знак на протест поради сексуално вознемирување. Неодамна беше објавено дека Гугл во последните две години поради сексуално вознемирување отпуштил 48 вработени, вклучувајќи 13 луѓе на високи позиции.
И самиот генерален директор Сундар Пичаи го поддржува протестот. Се наведува дека Рубин во 2014 година за отказот примил отприемнина во износ од 90 милиони долари, иако обвинувањата за сексуално вознемирување против него биле кредибилни.
Big crowd here now at Google Dublin for the #GoogleWalkout pic.twitter.com/hvRgPHX27D
— Will Goodbody (@willgoodbody) November 1, 2018
Со протестот под назив ,,Излези за вистинска промена” инженерите и другите вработени сакаат да испратат порака до компанијата ,,Гугл” дека треба да биде потранспарентна кога станува збор за сексуално вознемирување. Во истиот натпис се откриваат обвинувања против уште неколку високопозиционирани вработени во компанијата.
Извршниот директор на Гугл Сундар Пичаи неодамна упати мејл за извинување до вработените во кој се извинува за ,,постапките на компанијата во минатото”. Пичаи во мејлот не ги споменува обвинетите по име, но не ги демантира обвинувањата.
Денешниот протест со учество на околу 94.000 вработени покажува недоверба кон компанијата ,,Гугл” и дека таа чини се’за сузбивање на ваквото однесување, наведува АП.