ВМРО-ДПМНЕ го оспори новиот директор на Спортска академија

Добивај вести на Viber

Филип Ѓорѓиев од ВМРО-ДПМНЕ на прес конференција го истакна партискиот став за оспорување на Владимир Лазаревски како нов директор на Спортската академија бидејќи според нив бил нестручен и несоодветен кадар за оваа институција.

– Само неколку дена откако Дејан Јовановски беше именуван за член на ИК на ВМРО-ДПМНЕ, владата на СДС го разреши од функцијата директор на Спортската академија, а на негово место назначи професор по историја. Па така спортската академија наместо докажан спортист ќе ја води Владимир Лазаревски професор по историја. Замислете, професор по историја, ќе ја води Спортската академија. Го прашуваме Зоран Заев какво спортско достигнување има Владимир Лазаревски или дали бил дел од некој спортски клуб? Со какви искуство во спортот ќе придонесе за развој на оваа академија?, праша Ѓорѓиев.

Тој додаде дека Дејан Јовановски крајно професионално ја вршел работата како директор на академијата, а позицијата ја добил поради неговото искуство во областа на спортот, односно како поранешен кошаркарски интернационалец, поранешен секретар на Македонската кошаркарска федерација и директор на КК „Работнички“.

– Водејќи се по принципот на Заев од „чистачка до директор“ за партизација на институциите, очигледно дека на СДС не му се важни успехот и придонесот во полето на македонскиот спорт, а со тоа и успех и придонес за Македонија како земја. На СДС важно му е само да намести партиски кадри кои не мораат да ги водат институциите на професионално и високо ниво, туку да работат како Зоран Заев ќе нареди, рече Ѓорѓиев.

Според него било крајно несериозно и срамно Спортската академија наместо докажано лице во областа на спортот да ја води лице кое немало искуство во спорт.

– За безобразното однесување на СДС и хаосот кој планираат да го создадат и во македонскиот спорт ќе следи политичка одговорност и нивните несериозни политики граѓаните ќе ги казнат на престојните локални избори, рече Ѓорѓиев.