ВО „КОЗЛЕ“ ХОСПИТАЛИЗИРАНИ 20 ВОЗРАСНИ ПАЦИЕНТИ СО КОВИД“: Двајца се на кислородна поддршка

Добивај вести на Viber

Во Институтот за белодробни заболувања кај децата „Козле“ се сместени 20 пациенти кои болнички се третираат од Ковид-19, а има и 3 дечиња за кои се уште се чекаат резултати, изјави директорот на Институтот, д-р. Ангелчо Андоновски, кој заедно со министерот за здравство, Венко Филипче направија увид во актуелната состојба во оваа болничка установа.

- Двајца од пациентите се на кислородна поддршка, а тие се на возраст од 41 до 85 години, во текот на денот можеби ќе бидат донесени и повозрасни. За три од децата кои се сместени тука се чекаат резултати од ковид-тестовите, а две се во добра здравствена состојба и се чекаат нивните резултати за да видиме дали ќе бидат отпуштени на домашно лекување, истакна д-р. Андоновски.

Во овој период, како што изјави Андоновски, овој Институт функционира со помош на  тимови од Клиниката за инфективни болести и со интернисти.

-Конкретно има 10 интернисти и двајца професори-специјалисти инфектолози. Оваа болничка установа, која од неодамна е Ковид-центар, ќе биде засилена дополнително и со нашоте колеги од Институтот за белодробни заболувања и туберкулоза во рамки на Клиники „Мајка Тереза“. Ги очекуваме уште во текот на оваа недела, рече Андоновски.

Тој посебно нагласи дека секој симптом што ќе се почувствува би требало да биде аларм за пациентите веднаш да се јават на лекар и да не бараат помош кога состојбата им е крајно влошена.

-Не значи дека не може да му се влоши состојбата на пациент кој ќе дојде тука со лесна или средна тешка клиничка слика, но сепак, пациентите не смеат да чекаат да се јавуваат на лекар кога им е најтешко. Само доколку навреме побараат лекарска помош може правилно да бифат тријажирани, дијагностицирани и третирани за да нема несакани последици, вели Андоновски.

А.Б.