Во ноември нагло намален бројот на емигрантите пристигнати во Грција

Добивај вести на Viber

Европската агенција за управување со надворешните граници (Фронтекс) соопшти дека бројот на мигрантите, кои пристигнале во Грција, е намален нагло во ноември, пренесоа американските медиуми. Сто и осум илјади се пристигнатите луѓе во ноември во Грција, во однос на 150 000 во октомври. Фронтекс го истакна лошото време и рестриктивните политики во врска со граничната контрола по маршрутата низ Западен Балкан како веројатни причини за падот бројот на мигрантите. Фронтекс пријави дека 715 000 мигранти пристигнале на грчките острови кон крајот на ноември, 16 пати повеќе отколку во истиот период минатата година. Повеќето од мигрантите се Сиријци, Авганистанци и Ирачани. На унгарската и на хрватската граница исто така се забележува намалување на бројот на илегалните мигранти - до 164 илјади луѓе, соопштува Фронтекс. Мигрантите, откриени на пат меѓу Либија и Италија, исто така се намалени. Во овој регион во ноември границата ја преминале илегално 3200 лица. За 11-те месеци од годинава во овој регион се регистрирани 144 000 илегални мигранти. За 11-те месеци од оваа година надворешните граници на ЕУ нелегално ја преминале околу 1,55 милиони лица, соопшти Фронтекс. Вкупниот број на нелегални премини на надворешните граници на ЕУ во ноември беше 269 000, додека за целата 2014 година беше 283 000 премини. Прес-службата на Фронтекс, сепак, истакна дека еден ист човек може да се забележи на границата со Грција, а потоа повторно да биде вклучен во бројката кога навлезе на територијата на Хрватска или Унгарија.