Возовите во Грција не сообраќаат – железничарите против приватизација
Објавено во: Балкан 12 Јули, 2016
Во соседна Грција денеска не сообраќаат возовите, поради 24-часовниот национален штрајк на вработените во државната железница, јави дописникот на МИА од Атина.
Токму поради овие причини во земјата не функционира ниту меѓуградскиот железнички сообраќај, а не работи ниту метро-линијата до меѓународниот аеродром во Атина. Останатиот дел од метро мрежата работи нормално.
Синдикатот на вработените во железницата го организира штрајкот против планот за приватизација, по понудата доставена од страна на италијанската железница „Трениталиа“ за купување на „Траиносе“, како и поради непотпишувањето нов колективен договор.
Штрајкот кој требаше да заврши денеска на полноќ е продолжен до 14 јули за патничкиот и до 17 јули за товарниот сообраќај.
Со штрајкот се бара и потпишување колективни договори, вработување на дел од хонорарците со подобри услови и гарантирање на работните места на вработените.