Вратено првото обвинение на СЈО, ќе се бара изземање на судијката

Добивај вести на Viber

Основниот суд Скопје 1 ја вратил  документацијата на Специјалното јавно обвинителство за обвинителниот акт во кој требаше да им се суди на 7  лица вработени во УБК, а прво осомничен во случајот „Тврдина“ е началникот на петтата управа, Горан Грујовски.

Тие се товарат за кривично дело фалсификување на службена исправа , а произлегува од содржината на незаконското следење на комуникациите. 

„Во прилог на доставениот обвинителен предлог против осомничените лица, доставена е и листа на докази и попис на списи со приемница, меѓутоа од содржината на пописот не произлегува дека е доставен акт за декласификација на доказите за потребите на судската постапка врз основа на кој класифицираните докази може да се користат во постапката, односно да може да се оцени основаноста на обвинението, со оглед на тоа што без ваков акт, истите не може да бидат користени од страна на судската служба, за оформување на списите на предметот“ - стои во соопштението од Судот. 

Од СЈО велат дека повторно ќе ги достави доказите до Основниот суд Скопје 1 Скопје, кои им беа вратени денеска. 

„Во писмениот допис доставен до Судот укажано е на непостоење на законски пречки судската служба да евидентира и прима класифицирани информации и на законските обврски секој орган кој работи со класифицирани информации да обезбеди административни и човечки ресурси за работа со класифицирани информации“ - наведуваат од СЈО. 

Од СЈО утре ќе поднесат барање за иземање на судијата од предметот.

Судијката Лидија Петровска кој треба да го води овој случај беше избрана по електронски пат, а нејзиното име се спомнуваше во „бомбите“ кои ги објави опозицијата.