Вучиќ: Трамп носи неверојатни промени, една од нив е укинувањето на „факт чекерите“

Добивај вести на Viber

Српскиот претседател Александар Вучиќ синоќа изјави дека новоизбраниот американски претседател Доналд Трамп носи неверојатни промени,  а како пример за тоа ја наведе најавата на Марк Цукерберг дека под влијание на новоизбраниот американски претседател, како и на Илон Маск, ќе ги укинува „факт чекерите“.

„Се сеќавате ли пред само неколку месеци, што и да зборувавте за некои регионални настани, што и да зборувавте во корист на властите во Србија, некој ќе ви ги симнуваше налозите, објавите, профилите и сè друго.

Значи, најлошите лажговци што постојат во Србија, но поврзани со невладини организации, кои се поврзани со таргетирани невладини и некои други западни невладини организации, и сите под широкиот чадор на одредени западни безбедносни и разузнавачки агенции, тие ви велат, добро, ова не е во наш интерес, тоа е лага“, изјави Вучиќ за ТВ Пинк.

Тој истакна дека доаѓањето на Трамп носи структурно длабоки промени во крвотокот на светот и дека е среќен поради тоа бидејќи „ќе има повеќе слобода“ со укинувањето на „Вистиномерите“.

 „Среќен сум поради тоа. Има повеќе слобода. Затоа што ова го менува односот на силите во светот. Ова е надеж за глобалниот југ.Ова е надеж за нормалните луѓе ширум светот. Ова е надеж за нормалните луѓе во Америка. Ова е надеж за нормалните луѓе во Германија, Франција, секоја земја во светот“, рече Вучиќ.

Тој додаде дека поради „факт чекерите“ е намалена видливоста на некои медиуми, се отстрануваат нивните текстови и дека така функционирала машинеријата на лаги.