За 5 месеци ќе профункционира подземниот катастар

Добивај вести на Viber

За околу пет месеци во Македонија ќе профункционира подземниот катастар кој е од голема важност, вели директорот на Агенцијата за катастар и недвижности, Славче Трпевски, во интервју за Курир. Според директорот, работите на теренот течат,  формирана е работната група и направена е анализа на целокупната состојба со инфраструктурните мрежи. „При таа анализа се констатира дека состојбата не е добра, самите тие ги немаат податоците за своите недвижности, па затоа ни се случуваше при одредени ископи на улици и други активности да дојде до прекин на електрична енергија, телефонија и така натаму. Со цел понатаму Агенцијата за катастар да дојде до подземниот катастар преку надворешен консултант обезбеди една студија којашто го трасираше патот како Агенцијата за катастар и недвижности да стигне до подземниот катастар“, информира директорот.. Според Трпевски, бенефитите од подземниот катастар ќе бидат големи, водовите ќе се заштитат, а граѓаните од катастарот ќе добијат податок што се има околу една парцела каде што треба да градат. Втората голема функција на подземниот катастар е важна и за самите компании. „Сега ќе добијат имотен лист и тоа ќе се одрази на самата вредност на сите компании. Компанијата понатаму ќе може да располага со имотниот лист како и секој друг објект. Доколку немаат потреба од определен дел од истиот, можат да го продадат. Доколку истиот им е вишок, но не сакаат да го продадат, можат да го дадат под закуп и некој друг да стопанисува со него. Или, пак, доколку сакаат да градат нов објект, ќе може да го стават под хипотека, да обезбедат кредит од банка и понатаму да вложуваат во нови објекти. Во правен промет веќе се создадени сите правни услови за да ставиме во правен промет огромна количина на недвижен имот, се мисли на инфраструктурни објекти кои до сега буквално ги немаше никаде“, вели Трпевски за Курир.