За Милчин Меѓународен сојуз е Сојуз на лажните светци
Објавено во: Македонија 11 Август, 2019
За професорот Владимир Милчин, Меѓународен сојуз на Боки 13 кој е во притвор за случајот „Рекет“ е Сојуз на лажните светци.
Прашува кој со кого се здружил во тој сојуз.
„Ја гледав на јутјуб снимката од тричасовната конститутивна седница и видов и слушнав мнозина домашни, но странци ниту видов ниту слушнав. Ни во органите на управување нема странци. И веб-страницата на т.н. меѓународен сојуз е само на македонски јазик.
На страницата читам: Асоцијација за заштита на цивилно општество и социјално загрозени категории, а под тоа: Меѓународен сојуз – Скопје. Малку потаму читам: Меѓународен сојуз – Скопје е граѓанска асоцијација за заштита на цивилно општество и социјално загрозени категории. Кутрото цивилно општество! Кој ќе го заштити македонското цивилно општество од компромитацијата предизвикана со аферата „Рекет“, во која во една од главните улоги се јавува претседателот на Сојузот Бојан Јовановски познат како Боки 13, бонвиван, љубител на скапи брендови, миленик на неколку политичари од врвот и, така вели тој, сопственик на една телевизија. Чудо од детета со круна на главата! На веб-страницата не најдов многу податоци за активностите, но затоа видов многу фотографии на Боки 13. Кога ја отворив секцијата Проекти, налетав само на реченицата: „Во обработка“. По повеќе од ДВЕ години од основањето! Имено, актот за основање е од 31 мај 2017 година“, пишува Милчин на Фејсбук.
Прашува во која банка во оваа држава приватно лице може да подигне кеш во износ од 720.000 евра на име на авторски хонорар. Тој ги споменува сите нелогичности околу функционирањето на оваа организација.
„Дали и СЈО, на чело со Катица Јанева, наместо да донесе правда, се претворил во таков параван, ќе видиме набргу. Она што е јасно е дека одговорноста паѓа врз Заев, неговата влада и администрација. Зошто? Зашто скандалот пукна кога тие ја имаат власта. Зашто Заев е и премиер и претседател на најголемата партија во владејачката коалиција. Заев е должен да се соочи со проблемот и да го расчисти. Ако, поради кои било причини, не може да го направи тоа, треба да си даде оставка“, пишува Милчин.
Вели дека доколку моќните ѕверки во политиката и бизнисот ја договорат највалканата зделка во постјугословенска Македонија, дефинитивно ќе ја убијат надежта и на оние кои не можат или не сакаат да се иселат во земјите на „проклетиот Запад“.