Заев, Димитров и Османи утре во Софија
Објавено во: Македонија 16 Јуни, 2021
Премиерот Зоран Заев заедно со вицепремиерот за евроинтеграции Никола Димитров и министерот за надворешни работи Бујар Османи утре ќе остварат работна посета на Софија со цел, како што најавуваат од Владата, интензивирање на напорите за наоѓање решенија за отворените прашања и за деблокада на европската интеграција земјата.
Премиерот и владината делегација ќе остварат работни средби со бугарскиот претседател Радев, со бугарскиот премиер Стефан Јанев, како и со претставници на поголемите политички партии во Вугарија.
Заев вчера, одговарајќи на новинарско прашање какви се неговите надежи за старт на преговорите до 22 јуни, изјави дека нема голем оптимизам во него дека за овој кус период ќе се променат нештата и дека не сака да и дава лажна надеж на јавноста.
„Она што морам да го кажам, е дека имам чувство дека на 22 јуни нема да се реши проблемот, бидејќи Бугарија има техничка Влада и нема парламент. Но, не е невозможно да се реши. Зошто го кажувам ова, затоа што не сакам да ги дигнам очекувањата на нашите граѓани. Бидејќи реалност е дека во Бугарија има избори. Имам чувство на одговорност пред нашиот народ да кажам дека наша должност е да направиме се. И нема зијан ако направиме успех, и заклучиме отприлика договор, кој што би бил верификуван и од политичка Влада и од парламентот“, рече Заев.
Ова Заев го изјави по неговата средба со бугарскиот претседател, на НАТО Самиотот, која следуваше после средбата на Радев со нашиот претседател Стево Пендаровски.