Заев уште еднаш побара побргу да се донесе регистарот на информативни портали

Добивај вести на Viber

Премиерот Зоран Заев денеска уште еднаш побара што е можно побргу Здужението на новинари на Македонија да го донесе регистарот на информативни портали во кој ќе бидат вклучени само веб-страните кои ги исполнуваат стандардите со што јавноста и оние кои се рекламираат ќе знаат кој ги објавува лажните вести, а кои се придржуваат до принципите.

„За поздравување е иницијативата за регистар на професионални онлајн медиуми со кој ќе и се посочи на јавноста кои портали ги исполнуваат критериумите да бидат медиуми, но и кои се тие кои се придржуваат до новинарскиот кодекс при своето работење и имаат транспарентно сопствеништво и импресум, на Здружението на новинарите на Македонија, Стопанската комора и Советот за етика во медиумите.

Всушност, за поздравување е секоја иницијатива која придонесува да се направи јасна разлика меѓу новинарската критика и лага. Мораме сите ние како граѓани да направиме разлика меѓу критиката која е сојузник и лагата која е непријател на нашето демократско општество.

Критичкото новинарство е во основата на едно демократско и отворено општество. Критиката е корисна, а конструктивната критика придонесува кон унапредување и развивање на општеството во сите негови сфери“, порача премиерот на својот профил на Фејсбук.

Шефот на Владата го повика ЗНМ и останатите структури кои соработуваат на овој проект да го изготват регистерот што е можно побргу.

„Затоа манипулацијата и лагата мора да се соочат со отпор. Лагата прави штета, а манипулаторите им штетат и на здравите демократски процеси. Уште повеќе, кукавичлук и лицемерие е оние што во континуитет продуцираат дезинформации и лажни вести да се кријат зад слободата на говорот.

Ја охрабрувам новинарската фела, медиумската заедница, колку што може побргу, да ги утврди стандардите кои јасно ќе ги дефинираат разликите меѓу критичките новинари и медиуми и пропагандистичките машинерии за лажни вести“, додава Заев.

Слична порака премиерот упати и вчера на заедничката прес-конференција со шефот на српската влада Ана Брнабиќ.