Законот за дивоградби се враќа во Собранието
Објавено во: Македонија 15 Мај, 2021
Законот за дивоградби е пред повторна собраниска процедура.
Шефот на државата, Стево Пендаровски не го потпиша Указот за прогласување на Законот за утврдување правен статус на бесправо изградени објекти.
Пендаровски вчера го извести спикерот Талат Џафери, дека одлучил да не го потпише Указот за прогласување на Законот, со образложение дека текстот е во спротивност со некои од темелните вредности на Уставот, како и со уставни одредби кои произлегуваат или се во врска со темелните вредности на Уставот.
Пендаровски е со став дека текстот на Законот нема општествена оправданост, односно не е во насока на заштита и промоција на јавниот интерес.
Претходно, петмина пратеници од помалите политички партии, кои му припаѓаат на владејачкото мнозинство, ја алармираа јавноста и му пишаа ургентно писмо на Пендаровски, да не го потпишува Законот за легализација на дивоградбите.Станува збор за двајца пратеници на Либерал-демократската партија, Моника Зајкова и Боби Мојсовски, двајца пратеници од ДОМ, Маја Морачанин и Мирослав Богдановски, како и пратеникот од Демократскиот сојуз, Павле Трајанов. Му пишаа дека ова законско решение е во целосна спротивност со урбанистичките планови и другите прописи.
Вицепремиерот за борба против корупцијата и криминал Љупчо Николовски смета дека дивоградбите кои требаше да бидат опфатени со новиот Закон за легализација не треба да се рушат оти на тој начин 50.000 граѓани ќе останеле брз покрив над главата. Николовски вели дека СДСМ и Владата ги штитат интересите на сиромашните и ранливите граѓани и затоа бил донесен Законот за легализација на бесправно изградени објекти.