ЗДРАВСТВЕНИТЕ РАБОТНИЦИ ОГОРЧЕНИ: Вакцинираме против ковид, а ние сè уште не сме вакцинирани

Добивај вести на Viber

Во услови кога кај нас бројот на вакцини може да се изброи на прсти, а истовремено заинтересираноста кај граѓаните за примање на вакцината против корона вирусот се зголемува, расте и револтот кај одредени здравствени работници, кои иако не се директно вклучени во лекување на ковид-пациенти, на секаков друг можен начин се изложени на ризик да се заразат со вирусот. Дел од нив за Фактор откриваат дека се уште се на листата на чекање за примање на вакцината иако се дел од тимовите кои вакцинираат против Ковид-19.

-Со првите вакцини кои стигнаа од Фајзер, односно донацијата од Србија, освен колегите од ковид центрите, се вакцинираа и колегите од Итната медицинска помош и тоа е сосем разбирливо бидејќи секојдневно трансферираат болни до здарсвтвените болнички установи. Ризикот е голем. Но, парадоксално е тоа што ние иако вакцинираме здрави луѓе, секојдневно сме изложени на ризик од заразата, па голема е веројатноста да се соочиме со проблем да нема кој да вакцинира понатаму. А генерално станува збор за бројка од 50-ттина луѓе, велат разочарано за Фактор дел од здравствените разботнци.

Истовремено се пожалија и оние кои прават тестови, без разлика дали ПЦР или брзи тестови, но велат дека во текот на една смена, ретко кој ќе дојде да направи тест заради службено патување или некоја хируршка интервенција. Сите останати се со симптоми на болеста.

-На 10-тина минути тестираме. Има здрави граѓани на кои овие тестови им се потребни заради други причини, но тие се многу ретки и речиси без исклучок нивинте резултати се негативни. Но, останатите, дури 95% кои доаѓаат ги имаат сите симптоми на Ковид-19, и без да ги дочекаме резултатите знаеме дека ќе бидат позитивни. Секако дека сме максимално заштитетни со опремата која е на нас цела смена, но ризикот е голем. Најдобро би било и ние да влезевме во првата група за вакцинирање, па човек да биде колку-толку помирен, велат здравствените работници од пунктовите за тестирање.

А, додека трае борбата за вакцинирање, дел од македонските граѓани кои имаат српско државјанство ја искористија можноста да се вакцинираат во соседна Србрија. Најчесто ги бираат вакциналните пунктови во Бујановац или во Врање и велат дека вакциналниот процес тече без никакви проблеми.

-Минатата сабота бевме со татко ми во Бујановац. И двајцата имаме српско државјанство, освен тоа, татко ми има и српска лична карта, па немавме никакви проблеми да не викнат за вакцинирање против корона вирусот. Но, во тој момент во вакциналниот пункт во Бујановац ја имаа само вакцината на АстраЗенека, па одлучив само јас да ја примам. Татко ми рече дека ќе почека уште некое време да го викнат повторно кога ќе имаат или од кинеските или од руските вакцини. Тој има 70 години, па од информациите кои досега излегоа во јавноста, експертите велат дека АстраЗенека е одлична вакцина, но за луѓето до 65 години, вели Д.Стојановиќ за Фактор.

Го сподели и искуството во однос на реакцијата после примањето на вакцината од британско-шведскиот производител, нагласувајќи дека имала само покачена температура и малаксаност кои траеле неколку часа. Ревакцината е дури за три месеци.

Анита Буховски