Знаете каде е Сулејманија? Инвеститори од таму ја „меркаат“ Македонија

Добивај вести на Viber

Бизнисмени од Сулејманија, град во Курдистан, област во Северен Ирак се заинтересирани за увоз на македонски земјоделски производи, но и за инвестиции во земјава. Делегација од стопанственици од оваа област учествуваа на бизнис форум во Скопје и најавија дека сакаат да воспостават интензивни бизнис врски со партнери од земјава и значително да го подигнат нивото на соработка. „Имаме многу малку информации за македонското стопанство и трговија. Затоа и дојдовме тука, да се запознаеме непосредно, да воспоставиме директни односи со вашите компании, што ќе биде мост за натамошна соработка. Потенцијалот е огромен од двете страни, мора да се искористи“, рече Јасин Рахим Фарај од Трговско-индустриската комора на Сулејманија. Освен оскудните информации за потенцијалите за земјава, причина за минималната размена до сега се и визите и немањето дипломатско-конзуларни претставништва. Фарај додава дека Курдистан е 100% безбеден и може да се искористи за влез на ирачкиот пазар. „Сакаме повторно да ја изградиме нашата економија, да постигнеме напредок во индустријата и земјоделството. Но, заинтересирани сме и за вложувања во Македонија“, додава тој. Курдистан реализира 17 отсто од вкупниот приход на Ирак. Брои 6,6 милиони жители, има широка автономија и е бесцаринско подрачје, богато со нафта и минерални суровини. Оваа област отвора можности за македонските компании од областа на градежништвото, туризмот, земјоделството, металниот сектор, како и фармацијата, велат од Стопанската комора на Македонија.

Размената меѓу Македонија и Ирак минатата година беше само 3,4 милиони долари што е дури 15 отсто помалку во однос на 2012-та. Максималната вредност од вкупно 7,5 милиони долари се постигна во 2011 година. Во структурата на македонскиот извоз таму доминира извозот на свежо јабоолко, а лани првпат се извезоа лекови и метални конструкции.