Зошто Српската народна партија бара затворање на границата со Македонија?
Објавено во: Балкан 10 Јули, 2016
Српската народна партија која на изборите беше дел од коалицијата предводена на Српската напредна партија на премиерот Александар Вучиќ, денеска побара од српската влада да нареди „итно затворање на границата со Македонија“.
Од партијата ова го бараат со цел да се спречи „неконтролиран прилив на мигранти на територијата на Србија“.
„Доколку затворањето на граничните премини не обезбеди запирање на неконтролираниот прилив на мигранти на територијата на нашата земја, СНП инсистира на поставување бариера на границата со Македонија, на ист начин како што тоа го направуја многу земји од ЕУ. Поставувањето бариери на границите е принцип што се применува во цела Европска Унија. Србија треба да почне да спроведува иста мигрантста политика, каква што спроведуваат и земјите членки на ЕУ “- се наведува во соопштението на СНП.
Оваа партија во српската јавност е позната по своите проруски и анти-ЕУ ставови.
Партијата наведува дека огради на своите граници веќе поставиле Унгарија и Австрија, а дека такви мерки најавува и Хрватска.
Српскиот министер за внатрешни работи, Небојша Стефановиќ, во петокот при посетата на Центарот за прием на бегалци во Прешево, во близина на српско-македонската граница, рече дека изминативе недели е регистиран зголемен прилив на мигранти низ Србија. Тој објасни дека тие во најголем број во земјата влегуваат од територијата на Бугарија.
Според него, главен проблем во овој случај се криумчарите со луѓе и најави решителна борба против малите, но организирани групи на криумчари.