Криза ли е? Која домашна фирма зашпара 2,6 милиони евра и ги орочи во банка?

Добивај вести на Viber

За малите акционери во „Макошпед“ добро е тоа што сега знаат дека 2,6 милиони евра од продажбата на недвижен имот, не се дадени во позајмици на братски и сестрински фирми, туку се орочени во девизни и денарски влогови во домашни банки. Помалку добро за нив е тоа што сега може да се помират со тоа дека постот за дивиденда ќе продолжи „до даљнег“...

Скопската шпедиција „Макошпед“ успеа да заштеди 2,6 милиони евра. Оваа компанија лани ги орочи овие пари во девизни и во денарски депозити во домашни деловни банки. И тоа го оствари во деловната година во која компанијата оствари вкупен приход од 1,1 милиони евра.

Како зашпара 2,6 милиони евра од приходи вредни 1,1 милиони евра?

„Макошпед“ лани продаде недвижен имот на локација во близина на македонско-грчката граница кај Битола. Од таа продажба друштвото инкасира над 3 милиони евра. Повеќе детали има на овој линк https://faktor.mk/kade-direktorite-na--makoshped-vlozija-26-milioni-evra

Акционер во „Макошпед“ потврди дека Одборот на директори на ова друштво одлучил најголем дел од парите што се остварени од продажбата да бидат вложени во орочени девизни и денарски депозити.

Одлуката директорите кои го сочинуваат Одборот што управува со „Макошпед“ ја донеле врз основа на Статутот на друштвото и согласно со Законот за трговски друштва.

„Макошпед“ лани оствари вкупни приходи во износ од 1,1 милиони евра од неговото оперативно работење. Оперативните расходи на друштвото беа поголеми од приходите за 120.000 евра, но друштвото заврши со добивка благодарејќи на продажбата на недвижниот имот.

„Макошпед“ има три големи акционери од кои два имаат речиси идентично учество во вкупниот број гласови. „Мепком“ држи 19 отсто од акциите, а „Уготур“ 18,9 отсто. Еден од најбогатите луѓе во земјава Илија Гечев од Кавадарци преку својот челичарски гигант „ИГМ Трејд“ поседува 12,9 отсто од акциите во компанијата. Стерилизарани се 10 отсто од акциите кои се во сопствен откуп и не носат право на глас. Другите 32 отсто се распределени во рацете на повеќе од 600 мали акционери – домашни физички лица.