Цукерберг: Пронајдовме многу различни профили од Македонија за лажни вести
Објавено во: Македонија 22 Март, 2018
Сопственикот на „Фејсбук“, Марк Цукерберг, во интервју за „Си-ен-ен“ изјави дека лани пуштиле нови алатки за вештачка интелигенција, за да откријат лажни профили што се обидуваат да шират лажни вести, и дека пронашле голем број такви профили од Македонија.
„Во 2017 година, за време на изборите за Сенатот во Алабама, пуштивме нови алатки што ги направивме за да откриеме лажни профили кои се обидуваа да шират лажни вести и пронајдовме многу различни профили од Македонија. Треба напорно да работиме за да им отежнеме на земји како Русија да се мешаат во избори и да направиме тролови и други луѓе да не можат да шират лажни вести“ – вели Цукерберг.
Ова е прво појавување на Закерберг во медиумите откако беше откриен скандалот со „Кембриџ Аналитика“, фирма за податоци која имала врски со кампањата на претседателот на САД, Доналд Трамп во 2016 година. Фирмата наводно имала пристап до информации на повеќе од 50 милиони „Фејсбук“ корисници без нивно знаење.
Цукерберг се извини за скандалот и потенцираше дека „Фејсбук“ прави напори за да запре мешање во изборите во 2018 година. „Фејсбук“ загуби околу 37 милијарди долари по скандалот со протекување лични податоци на повеќе од 50 милиони корисници. Тоа придонесе за пад на вредноста на акциите на социјалната мрежа за околу 7 проценти.