АЦВ - Високите плати се за лани: Фактор не ни тврдеше поинаку
Објавено во: Економија 31 Август, 2020
Агенцијата за цивилно воздухопловство е единствената институција во земјава која ги намали платите на вработените, во договор со Синдикалната организација на АЦВ, стои во реакцијата што Агенцијата ја испрати до Фактор. Утрово објавивме информација која се однесува на сумата која оваа агенција им ја исплатила на вработените по основ на плати. Фактор ги црпи податоците од Извештајот за работата кој Агенцијата го доставила до Собранието на усвојување.
Во рекацијата сепак стои појаснување дека извештајот е за 2019 година, иако и во нашиот текст никаде не стои дека е за годинава.
„Напротив, како резултат на економската криза предзвикана од Ковид 19, која во исклучително голема мера влијаеше врз нормалното одвивање на домашниот, но и меѓународен авиосообраќај, Агенцијата за цивилно воздухопловство е единствената институција во земјава која ги намали платите на вработените, во договор со Синдикалната организација на АЦВ. Што значи, платите на вработените во Агенцијата за цивилно воздухопловство, како независно регулаторно и небуџетско тело во земјава, се креираат во согласност со меѓународните воздухопловни правила и стандарди, и истите секогаш јавно и транспарентно биле ставени на увид на македонската јавност, преку финансиските извештаи доставени на усвојување во македонскиот парламент, стои во реакцијата.
Фактор во ниту еден момент не тврди дека платите се поделени сега. Свесни сме дека некои медиуми ја пренесоа информацијата со тврдења дека и во време на криза Агенцијата делела високи плати, ама укажуваме повтроно, дека тоа не е наш став. Сепак оваа институција со години е на врвот на тие кои исплатуваат високи плати. Тоа не е ниту лошо ниту е незаконски, сепак, како што објавуваме други финансиски извештаи редно е да се објави извештајот и на Агенцијата за цивилно воздухопловство.