АД ЕЛЕМ ќе учествува на најголемиот саем за енергетика во Виена

Добивај вести на Viber

Со свој штанд АД Електрани на Македонија - ЕЛЕМ и годинава ќе биде присутна на најголемиот саем за енергетика во Европа „Power Gen Europe 2013“, што утре официјално ќе биде отворен во Виена, Австрија. На саемот со свои штандови и презентации учествуваат компании од сите континенти чија основна дејност е производство на енергија и компаниите кои произведуваат опрема за енергетски капацитети. Ова е трето учество на АД ЕЛЕМ на „Power Gen Europe“ во саемскиот дел за промоција на обновливи извори на енергија. Пред две години во Милано и лани во Келн штандот на единствената македонска компанија која доесега излагала на најголемиот саем за енергетика го посетија преку 3.000 посетители и се воспостави комуникација со најголемите компании. АД ЕЛЕМ и годинава на својот штанд преку 3Д визуелизација ќе ги претстави развојните енергетски проекти во Република Македонија пред потенцијалните бизнис партнери кои ја гледаат Македонија како можна бизнис-дестинација. Ќе бидат претставени паркот на ветерни електрани „Богданци“, хидроелектраната „Бошков Мост“ и акумулацијата „Луково Поле“, проекти од кои дел се веќе во фаза на реализација, а за дел течат подготвителните активности. Годинава по прв пат ќе бидат претставени визуелните презентации на комплексот електрани на Црна Река „Чебрен и Галиште“ и проектот „Вардарска долина“.