АГРОКОР-МЕРКАТОР: Овој човек станува еден од највлијателните на Балканот!

Добивај вести на Viber

Хрватската прехранбена групација Агрокор денеска ја финализира транскацијата за купување на 53% од словенечкиот трговски синџир Меркатор. Иако понудата на Хрватите беше прифатена уште во јуни лани, сепак дури сега Агрокор успеа да ги обезбеди сите одобрувања за зделката, тешка над половина милијарда евра. Сопственикот на Агрокор Ивица Тодориќ веројатно ќе стане еден од највлијателните луѓе на Балканот откако неговата компанија ќе го заврши преземањето на Меркатор, но во истовреме ќе застане на чело и на една од најзадолжените групации во регионот, пишува љубљански Дневник. Од него директно ќе зависат 57.000 работни места во Словенија, Хрватска, Босна и Херцеговина, Србија и Црна Гора, а посредно и неколкупати повеќе. Новосоздадената компанија „џин“ ќе биде далеку најзадолжена на Балканот со вкупен долг од 5,3 милијарди евра. Но, во истовреме, таа е преголема за да пропадне, затоа што може да предизвика колапс на целиот финансиски систем на Балканот. Затоа, словенечките медиуми пишуваат дека на овој начин Тодориќ успеал да го спаси од пропаст не само задолжениот Меркатор, туку и сопствената деловна империја. Во Хрватска, купувањето на Меркатор од страна на Агрокор се оценува како „деловен потег на деценијата“ и „вистинско економско чудо“. „Да се случеше оваа транскација пред десетина години, односно пред кризата која длабоко го погоди пазарот на малопродажба во регионот на Југоисточна Европа, каде што работат овие две компании, оваа трансакција ќе имаше неспоредливо поголемо значење“, вели економскиот аналитичар Дамир Новотни за хрватската агенција Хина. Но, зделката наидува и на отпор, особено кај словенечките синдикати, кои инсистираат дека „спојувањето никако не требаше да се случи, затоа што би можело да има катастрофални последици“. За недела попладне најголемото словенечко синдикално здружение закажа протест во центарот на Љубљана на сите оние кои се против продажбата на овој најголем работодавач во Словенија на Хрватите.