АГРОКОР-МЕРКАТОР Тодориќ: Ќе направиме чудо со спојувањето!

Добивај вести на Viber

Сопственикот на хрватската компанија Агрокор Ивица Тодориќ, по преземањето на словенечки Меркатор, најавува дека ќе направи најмоќен трговски синџир во регионот. Во изјава за словенечката Планет ТВ, Тодориќ ги отфрлил шпекулациите дека ќе ги истисне словенечките добавувачи од Меркатор. „Ни требаат партнери. За нив ќе ги отвориме полиците, но мора да бидат конкурентни“, порачува Тодориќ. Тој со исклучителен оптимизам зборувал за иднината на Меркатор. „Некои велат дека сè ќе уништам, а ќе направиме чудо. Меркатор во краток рок ќе стане најмоќен и најуспешен трговец во регионот“, вели Тодориќ, кој смета дека преземањето на словенечката компанија е вистински и одличен деловен чекор. „Трговците во регионот се премали, без здружување не можеме да им конкурираме на глобалните играчи“, изјави сопственикот на Агрокор. Тодориќ тврди дека во Мееркатор нема да има отпуштања, а во Агрокор и неодамна вработил уште 350 нови работници. Во успехот на својот конгломерат воопшто не се сомнева и затоа, вели, се впуштил во ваков ризик. „За ова ги ризикував своите пари. Ако не успеам, ќе загубам сè“, заклучува Тодориќ. Концернот Агрокор го купи словенечки Меркатор за вкупно 544 милиони евра, од кои 324 милиони евра се за стекнување на стопроцентна сопственост, 200 милиони евра за намалување на финансиските долгови на Меркатор, а 20 милиони евра за оперативно финансирање на тековното работење. Двете компании заедно ќе остваруваат речиси седум милијарди евра годишен приход и ќе вработуваат повеќе од 64.000 луѓе, со што ќе бидат водечка компанија во секторот на малопродажба и производство на храна во регионот и пошироко. Но, словенечките синдикати не се согласуваат со преземањето, стравувајќи дека тоа ќе значи откази во Меркатор. Тие за денеска најавија масовни протести во Словенија.