Албанскиот заменик-министер на МВР пушел во ресторан во Њуjорк пред да биде разрешен

Добивај вести на Viber

Албанската министерка за внатрешни работи, Албана Кочиу, го разреши својот заменик Анди Махила затоа што запалил цигара во ресторан во Њујорк, што е спротивно на законите на таа американска држава.

Според министерката, албански државјанин кој живее во Њујорк им пријавил на властите дека Махила е виден како пуши цигара во ресторан, што е спротивно на законот што забранува консумирање тутун во затворени простории. Откако случајот бил потврден и докажан, Кочиу донела одлука да го разреши својот заменик.

„Секој може да направи грешка ненамерно и тоа може да се разбере, но пушењето цигара во бар не е ненамерна грешка, туку неоправдано кршење на законот“, рече Кочиу.

Таа нагласи дека ваквото однесување е особено неприфатливо за висок функционер на Министерството за внатрешни работи, институција одговорна за спроведување на законот и обезбедување на јавниот ред.

Министерката лично го информирала граѓанинот кој го поднел извештајот за исходот од случајот, уверувајќи го дека неговите загрижености „не наишле на глуви уши“.

„Ги уверувам сите граѓани дека секое нивно барање ќе биде слушнато со почит, не само со зборови, туку и со конкретни дејствија и принципиелни ставови, како што со право очекуваат од нас“, заклучи Кочиу.