Анѓушев: Оданочувањето на каматите да, за дивидендите одложување
Објавено во: Економија 05 Октомври, 2019
Вицепремиерот за економски прашања Кочо Анѓушев смета дека каматите на штедните влогови треба да се даночат, а оданочувањето на дивидендите од акциите да се пролонгира за неопределено време, бидејќи како што вели тој, берзата е се уште млада.
Според Анѓушев, треба да се остави простор таа да се развива. Законски предвидено е ваквото оданочување да стартува на почетокот на следната година, но ова значи дека втората мерка ќе треба да се пролонгира.
- Мислам дека треба овие две работи да се раздвојат. За депозитите и за каматите мислам дека треба да се даночат, а капиталните добивки да се стимулираат. Сите држави кои што биле во таа фаза на развој на берзата го направиле тоа, рече денеска Анѓушев пред медиумите.
Министерката за финансии Нина Ангеловска пред некоклу дена изјави дека по барање на Комисијата за хартии од вредност и Македонска берзата се разгледува опцијата плаќањето данок на остварената добивка од дивиденда како и на каматите кои граѓаните ги добиваат од заштедите во банките, да биде одложено.
Оваа мерка беше донесена во 2018 година од поранешниот министер за финансии Драган Тевдовски, а граѓниите треба да плаќаат данок од 15 отсто за дивиденди и заштеди во банки ако нивната камата годишно надмине 15 илјади денари.